كان نفسي اقول لك في اتساع

كان نفسى اقولك بى تأنّى وفى اتساع

لا هدا حيل شوقى السفر لا لامس احساسى الضياع

انا يانى انا

زولا موسر بالحنين مشحون هواك حتى النخاع

كان نفسى اجيك

اقعد قبالتك واحكى ليك فى الغربة ايه معنى إلتياع

وكيف الحنين وكتين يفيض تمسكنى رعشات إرتياع

تخنق فؤادى الزكريات وعيونى تزرف بى اندفاع

كان نفسى اقولك فى إتساع

داير احكى ليك عن السنين

بلاهى كيف إداخلن وإتمارقن مرن سراع

وانا يانى انا فى كل عام وكل سنة

فى نفسى يتنوسر جرح مولود هو كان يوم الوداع

ومن يومى داك شايل حنينى وشوقى ليك

حايمبو فى كل البقاع

وفى نفسى عازم انتى لى بى كل إيمان واقتناع

ما بكره يتلم شملنا والفرحة تتناثر شعاع

تبحر سفينة حبنا نفرد وشاح الريد شراع

نتساقى كاسات الحنان اشواقنا تهجد فى انصياع

نتناجى نتهادى الأمان فى مرسى ينضح إلتماع

منضود عيونك و بسمتك مالياهو بى رغم الوساع

كان نفسى اقولك بى تأنّى وفى اتساع

كان نفسى اسع احكى ليك

لو زكرى مرة فى خواطرك وبين عينيك

لحظة مشاهدة بالكلام بى كل إلفة واحترام

ممزوجة بى صرة وشى ونظرات رقيقة واحتدام

وفى لحظة انقطع الكلام

ويا دوب قعد نصحى ونفيق

داير امور داير أثور ....تتزكرى ...وبعد الكلام عاد الكلام

وضحكنا بى طيبة وصفاء ...

داير احى ليك عن حالتى غيرك ظلمة كيف

كل العلاقات مغرضة الصدق حلا مكانو زيف

حتى المشاعر عارضة مرات تجى ومرات تقيف

بلاهى شوفى حياتى كيف ..

وحدة وسهاد ..أشواق وامانى واجتهاد

وأجيج احاسيس مستعر...

وانا يانى انا

لسه شايلك فى المحاجر والرؤى

بكره وزمان احلام وطيف ...

كان نفسى اقولك فى اتساع

الأخت الراقية ريم يسلم زوقك وإختيارك للكلمة والحرف .. وديما يا الله ما تحرمينا من مشاركتك
أرباب